अबदेखि श्रम इजाजत प्रक्रियाका लागि श्रमिक आवश्यकताको विज्ञापन केवल राष्ट्रियस्तरका पत्रिकामा मात्र नभई सरकारले सञ्चालनमा ल्याएको ‘श्रम संसार पोर्टल’ (www.shramsansar.gov.np) वा ‘श्रम संसार एप’ मा समेत अनिवार्यरूपमा राख्नुपर्ने भएको छ।
बिज्ञापन
श्रम तथा व्यवसायजन्य सुरक्षा विभागले श्रम ऐन, २०७४ को दफा २२ को उपदफा (३) र श्रम नियमावली, २०७५ को नियम ७ अनुसार यो व्यवस्था कार्यान्वयनमा ल्याएको हो। विभागका अनुसार रोजगारदाताले नेपाली दक्ष श्रमिक आवश्यक परेमा त्यसबारे विज्ञापन राष्ट्रियस्तरको पत्रिकामा प्रकाशन गर्नुपर्ने कानुनी प्रावधान विगतदेखि नै छ। तर अबदेखि सोही विज्ञापन ‘श्रम संसार रोजगार पोर्टल’ वा ‘एप’ मा पनि अनिवार्य रूपमा राख्नुपर्ने स्पष्ट गरिएको छ।
बिज्ञापन
विभागका निर्देशक मणिनाथ गोपद्वारा जारी सूचनामा भनिएको छ, “यदि यस्ता विज्ञापनबाट पनि नेपाली नागरिकबाट तोकिएको दरखास्त प्राप्त नभएमा वा नेपाली छनोट हुन नसकेमा मात्र विदेशी श्रमिकका लागि श्रम इजाजत माग्न सकिने व्यवस्था छ।” सो अनुरूप श्रम इजाजतका लागि आवेदन दिने रोजगारदाताले पत्रपत्रिकासँगै श्रम संसार पोर्टल वा एपमा समेत विज्ञापन राखिएको प्रमाण पेश गर्नुपर्नेछ।
नेपाल सरकार, श्रम, रोजगार तथा सामाजिक सुरक्षा मन्त्रालयले निर्माण गरेको श्रम संसार पोर्टल अब नागरिक एप सँग पनि समन्वयमा रहेको जनाइएको छ। यसबाट श्रमिकले पनि देशभर कहाँ कति रोजगारी खुला छ भन्ने जानकारी सजिलै पाउने र श्रमिक छनोट प्रक्रिया पारदर्शी तथा प्रतिस्पर्धात्मक हुने अपेक्षा विभागको छ।
बिज्ञापन
यो सूचना सार्वजनिक भएसँगै अब प्रविधिमा आधारित श्रमिक व्यवस्थापन प्रणालीतर्फ सरकार गम्भीर हुँदै गएको संकेत देखिएको छ। विभागले सरोकारवालाहरूलाई यो व्यवस्था कार्यान्वयनमा पूर्ण रूपमा सहयोग गर्न समेत अनुरोध गरेको छ।
